جدتي قبل ماتموت بيومين
وفي يوم لقيت باب شقتنا بيخبط جامد، فتحت لقيت دانا واقفة قدامي، دانا دي ست عندها أربعين سنة بس لسه حلوة ومتشيكة أوي، قالتلي انتي ريتال؟ قلتلها آه، قالتلي بصي يا حبيبتي أنا جاية أنصحك نصيحة أخت، ابعدي عن ريان، ريان ده بتاعي أنا، وأنا وأبوه اتفقنا إننا هنتجوز قريب، وأهل الحتة كلها عارفة، وانتي مش عايزة الناس تقول إنك ماشية على خطى أبوكي وبتخطفي رجالة عيلتنا زي ما أبوكي عمل فيا زمان.
الكلام نزل عليا زي الصاعقة، قفلت الباب وقعدت أعيط، معقولة ريان بيضحك عليا؟ معقولة بيقول إنه بيحبني وهو متفق مع دانا؟ كلمت نور وقلتلها، نور اتصدمت وقالتلي والله ما أعرف حاجة، أخويا مستحيل يعمل كده، ده أبويا اللي كان عايز يجوزه دانا عشان يصلح اللي فات ويرجع العلاقات، بس ريان رفض وشتمهم كلهم وقالهم أنا بحب ريتال ومش هتجوز غيرها.
روحت وقفت في البلكونة بالليل وريان جه، أول ما شفته قلتله انت خاطب دانا؟ قالي مين قالك الهبل ده، قلتله هي جتلي لحد هنا وقالتلي، قالي اسمعي يا ريتال، أبويا نوح راجل دماغه قديمة، عايز يصلح غلطة زمان بغلطة أكبر منها، عايز يجوزني دانا بنت أخوه اللي قد أمي عشان يقول للناس إننا اتصالحنا مع عيلة جدتك، وأنا قلت لا، قلتله أنا بحب ريتال بنت الراجل اللي انت بتقول عليه ساب بنت أخوك، الحب ملوش دعوة بتار قديم يا بابا، وطبعا أبويا طردني من البيت يومين ورجعت.
قلتله طب ووصية جدتي، قالي جدتك يا ريتال كانت خايفة عليكي، كانت فاكرة إننا هنأذيكي زي ما أبوكي أذى دانا، بس أنا مش أبوكي، وأنا عمري ما هسيبك، أنا هثبتلك إن الحب أقوى من التار ومن الكبرياء ومن أي وصية اتقالت في لحظة خوف.
تاني يوم لقيت ريان جايب أبوه نوح وجاي على بيتنا، أنا كنت هموت من الرعب، أبويا مكنش موجود كان مسافر، فتحت لقيت عمو نوح راجل كبير ووشه كله طيبة، قالي يا بنتي أنا جاي أطلب إيدك لابني ريان، أنا عارف إن بيننا مشاكل قديمة وأنا كنت غلطان لما كبرت الموضوع وقطعتكم، بس ابني علمني إن اللي فات مات، وإن الواحد لازم يبص لقدام، وريان بيحبك وشاريكي، وأنا جاي أقولك إنك لو وافقتي هتبقي بنتي التانية، وهننسى كل اللي فات.
أنا عيطت، عيطت أوي، حسيت إن جدتي واقفة شايفاني، كنت خايفة أكسر وصيتها، بس في نفس الوقت حسيت إنها لو كانت شافت ريان وهو بيقول كده كانت هتوافق، رحت أوضتها وفتحت دولابها لقيت جواب قديم كانت كتباه بخط إيدها، لقيتها كاتبة لما كنت صغيرة، كانت كاتبة يا ريتال يا بنت قلبي، أنا بوصيكي متتجوزيش ابن الجيران عشان خايفة عليكي من القهر اللي شافته دانا، بس لو لقيتيه راجل بجد وبيحبك وشاريكي اكسري الوصية يا بنتي، الحب مبيتكسرش بوصية، أنا بس كنت خايفة عليكي.
