جدتي قبل ماتموت بيومين

أخدت الجواب وجريت على بره ووريته لريان وأبوه، ريان حضني قدام أبوه وقالي شوفتي؟ حتى تيتة كانت عارفة إن الحب أقوى.

وبعد شهر اتخطبنا، وعملنا خطوبة في الشارع كله، شارعنا اللي كان مقسوم نصين نص تبعنا ونص تبعهم بقى كله نور وزينة، معاذ أخو ريان كان هو اللي بيرقص وبيزغرط، ونور كانت بتعيط من الفرحة، ودانا؟ دانا جت باركتلي وقالتلي ربنا يسعدكم يا بنتي، أنا خلاص اتعلمت إن النصيب مش بالعافية، وأبويا رجع من السفر وحضن عمو نوح وقالوا كفاية بقى عشرين سنة مقاطعة عشان كلمة، احنا أهل.

ويوم فرحنا ريان مسك المايك وقال قدام الناس كلها، أنا اتجوزت بنت الجيران اللي جدتها موصياها متتجوزنيش، بس أنا أثبتلها إن الحب مبيعرفش وصية ولا تار ولا كبرياء، الحب بيبني بيوت كانت مهدودة، وريتال علمتني إن اللي يحب بجد مبيخافش.

وأنا دلوقتي بكتبلكم قصتي وأنا قاعدة في بلكونتي اللي بقت بلكونتنا أنا وريان سوا، والشباكين اللي كانوا مقفولين بستاير بقوا مفتوحين على بعض، وعرفت إن جدتي مكنتش عايزة تبعدني عنه، هي كانت بس خايفة عليا، ولما اتطمنت من حبه سابتني أختار قلبي.